Minbiziaren aurkako AECC Gipuzkoa elkarteak bi laguntza eman ditu gaur goizean, ikertzaile gazteak arlo onkologikoan prestatzeko. Alde batetik, Joanna López Biodonostiako ikertzaileak doktoratu aurreko laguntza jasoko du bularreko minbiziari buruzko ikerketa-proiektua bultzatzeko, eta, bestetik, Donostia Unibertsitate Ospitaleko Claudia Fernández Catalán-ek prestakuntza-laguntza izango du, onkologiaren arloan duen gaitasun profesionala areagotzeko.

Minbiziaren aurkako Gune Aktiboan izan da ekitaldia, AECC Gipuzkoak Donostian duen egoitzan, eta bertan izan dira Isabel Orbe, AECC Fundazio Zientifikoko zuzendaria, eta Juan Ormazabal, AECC Gipuzkoako lehendakaria.

Doktoratu aurreko laguntza Joanna Lopezentzat (Biodonostia)

AECC doktoratu aurreko laguntzak 3 urteko iraupena du, eta 4 urtera arte luza daiteke. Guztira 78.000 €-ko zuzkidura du (26.000 € urtean), eta helburua da unibertsitateko zientzia- edo ingeniaritza-titulua duten ikertzaileen diziplina anitzeko prestakuntza sustatzea. “AECC doktoratu aurreko laguntzei” esker, ikertzaileek minbiziari buruzko doktorego-tesia egin dezakete erreferentziako ikerketa-zentro batean, ibilbide zientifiko egiaztatua duen talde hartzaile baten laguntzarekin.

Joanna López Medikuntzako lizentziaduna da, Mexikoko Sonora Unibertsitatean. Karrera amaitzean, Biologia Molekularreko eta Biomedikuntzako masterra egin zuen Euskal Herriko Unibertsitatean, eta horren ondoren Biodonostia IISean sartu zen. Zehazki, María Muñoz Caffarel ikertzailearen taldean sartu da López, bularreko minbiziari buruzko oinarrizko eta translaziozko ikerketa-proiektuekin.

Prestakuntzako laguntza Claudia Fernándezentzat (Donostia Ospitalea)

Bestalde, prestakuntzako laguntza klinikoak 6.900 euroko zuzkidura du guztira, eta onkologiako hainbat arlotako prestakuntzaren bidez mediku espezialisten lanbide prestakuntza areagotzea du helburu.

Claudia Fernández Catalán Medikuntzan graduatu zen Nafarroako Unibertsitatean, eta, gaur egun, Donostiako Unibertsitate Ospitaleko Onkologia Medikoaren espezialitateko barne-mediku egoiliar gisa ari da prestatzen. Iaz geroztik, gainera, Biodonostiako onkologia-arloko talde bati laguntzen dio.

Minbiziari buruzko ikerketak bizitzak salbatzen ditu, eta, horri esker, batez beste %57ko biziraupena lortu da 200 tumore mota baino gehiagoren artean, eta horietako batean %90 izatera iritsi da. Horregatik ezin da geldiarazi, nahiz eta koronabirusak krisia eragin, eta erakundeak ikerketa onkologikoa bultzatzen jarraitzen du: bizitzak salbatzen dituelako.

AECC minbizia ikertzeko proiektuei laguntzen aitzindaria da, eta minbizia ikertzeko proiektu gehien dituen erakunde pribatua da. Guztira, 380 ikertzailek baino gehiagok egiten dute lan, Elkarteak 70 M €-ko ekarpena egiten baitie ikerketari ez uzteko.