2026tik aurrera Minbiziaren Aurka Araban Elkarteak Osakidetzako osasun-zentroetan eta Osakidetzako Arabako Unibertsitate Ospitaleko Kanpo-kontsultetan egingo du lan, eta, horrez gain, Onkologian eta AUO Txagorritxuko Eguneko Ospitalean jarraituko du, gaur goizean Enrique Bárez, Arabako ESIko zuzendari kudeatzaileak eta Miren Bilbao, elkarteko presidenteak, elkartearen egoitzan, Zabalganan, sinatutako hitzarmenari esker. Eskainiko dituen zerbitzuen artean, arreta psikologikoa eta soziala, boluntario lagungarriak eta ariketa fisiko onkologikoa daude, hori guztia Arabako ESIarekin koordinatuta.

Akordio horren bidez, Osakidetzaren eta Arabako Minbiziaren Aurkako Elkartearen artean, minbiziaren prebentzioa bultzatu nahi da, minbizia duten pertsonei eta haien familiei akonpainatu eta lagundu, eta arreta humanizatua, hurbila eta konprometitua sakondu minbizia duten pertsonekin eta haien familiekin. Hori guztia haien bizi-kalitatea hobetzeko.

Minbizia da heriotza-kausa nagusia Euskadin, 2024an 2.200 pertsonak diagnostikatu zuten minbizia Araban, eta minbiziaren intzidentziak gora egiten du urtero. Eusko Jaurlaritzako Osasun Saila, Osakidetza eta Minbiziaren Aurka Araban Elkartea lanean ari dira minbiziaren eragina murrizteko eta pertsonen bizi-kalitatea hobetzeko, prebentzioaren, detekzio goiztiarraren, minbizidun pertsonei eta haien familiei laguntza eta ikerketaren bidez. 2030ean minbizian % 70 bizirautea du helburu.

Minbiziaren Aurka Araban Elkarteak Osakidetzaren instalazioetan eskaintzen dituen zerbitzuak zabaldu ahal izango dira lankidetza-hitzarmenari esker. "Lankidetza-hitzarmen handi bat da, eta lan komunitarioaren adibide bat, aukera emango diguna prebentzioa sustatzeko, arreta humanizatutako eredu bat bultzatzeko eta Arabako minbizia duten pertsonen bizi-kalitatea hobetzeko", azaldu du Bilbaok. Eskerrak eman dizkie Osakidetzari eta, bereziki, Arabako ESIari, Minbiziaren Aurka Araban Elkartearekin hartutako konpromisoagatik.

Bestalde, Enrique Bárez, Arabako ESIko gerenteak adierazi duenez, "Gure helburua herritarren osasun-egoera hobetzearen alde lan egitea da, eta pazienteek, familiek eta zaintzaileek hobekuntza hori hautematea, beren bizitzetan kalitate-urteak irabaziz. Horretarako, Euskal Osasun Itunean proposatutakoarekin bat etorriz, Osakidetzaren Arabako Erakunde Sanitario Integratuak gaur Minbiziaren Aurka Araban Elkartearekin sinatzen dugunaren moduko akordioak formalizatuko ditu. Eredu izatea nahi dugu lankidetza horiek esparru soziosanitarioko beste erakunde batzuekin eta pazienteen elkarteekin zabaltzeko".

Eusko Jaurlaritzako Osasun Sailak, Osakidetzak eta Minbiziaren Aurka Araban Elkarteak laguntza integrala eta humanizatua emateko eredu batean aurrera egiteko lankidetza indartu dute. Bi erakundeek minbizia duten pertsonak eta haien familiak kokatzen dituzte erdigunean, Arabako lurralde osoan ongizate fisikoa, emozionala eta soziala hobetzeko helburuarekin.

Lankidetza-ildoak

Akordioak hainbat jarduera-ildo jasotzen ditu. 2026tik aurrera, elkarteko profesionalek laguntza psikologikoa eta soziala eskainiko dute Arabako ESIko osasun-zentroen sarean, eta pazienteei eta senideei laguntza emango diete hala eskatzen dutenean.

Era berean, gaur sinatutako hitzarmenari esker, ariketa fisiko onkologiko pertsonalizatua eskainiko zaie paziente onkologikoei osasun-zentroetan. Zerbitzu berri honek duela urtebete baino gehiago elkartearen instalazioetan garatzen hasi zena osatzen du. Programak pertsona horien egoera fisikoa eta emozionala hobetzea du helburu. Gaur egun, ebidentzia zientifiko zabala dago ariketa fisikoak prozesu onkologikoan dituen onuren inguruan, tratamenduei erantzun hobea ere ematen baitie.

Bestalde, elkarteak presentzia izango du Osakidetzaren Arabako Unibertsitate Ospitaleko Kanpo-kontsulten eraikinean, eskaintzen diren programen eta zerbitzuen berri emateko. Jarduera honen helburua pertsona bakoitzaren egoera pertsonala, soziala, sanitarioa eta emozionala sakonki ezagutzea da, bere beharretara egokitutako Arreta Plan Indibidualizatua ezartzeko.

Elkartearen programei eta zerbitzuei buruzko informazioa emateaz gain, diziplinarteko lana eta profesionalen arteko koordinazioa bultzatuko dira, paziente onkologiko bakoitzaren beharrei erantzun eraginkorra eta pertsonalizatua emateko.

Harrera eta laguntza

Sinatutako hitzarmenean, boluntarioen koordinakundearen eta boluntarioen presentzia ere nabarmentzen da, AUO Txagorritxuko Onkologian eta Eguneko Ospitalean pazienteak eta senideak hartzeko eta laguntzeko, duela urte batzuetatik egiten den bezala.

Horrez gain, Osakidetzako eta atxikitako enpresetako langileek bizi-ohitura osasungarriak ezartzea sustatzeko lankidetza nabarmentzen da. Horretarako, prebentzio-, prestakuntza- eta hezkuntza-programak garatuko dira honako hauen inguruan: elikadura osasungarria, eguzki-babesa, tabakoa eta erretzeko modu berriak, sedentarismoa eta ariketa fisikoa, bigarren mailako prebentzioa eta baheketak, edo minbiziaren aurkako Europako kodea. Hori guztia osasuna hobetzeko lan komunitarioa sustatuz.

Zerbitzu guztiak doakoak dira, arreta psikologikoaz eta sozialaz gain, ariketa fisiko onkologikoa, taldeko eta banakako nutrizioa, taldeko fisioterapia, erretzeari uzteko programak, ibilbide osasungarriak, erlaxazioa, martxa nordikoko tailerrak, lagun egiteko boluntarioak, material ortoprotesikoaren mailegua eta ileordeak, besteak beste.

Gaur egun, elkarteak ospitalean ez ezik, bere egoitzan ere eskaintzen ditu zerbitzuak: Plaza Arkupedunean, 1 (Zabalgana-Gasteiz), Laudion, Amurrion eta Agurainen. 2025ean 1.100 pertsonei eman diete arreta Araban.